Act 15 | ASO | STEP | Zudaia misuboukoti' ve linge ma ingine Adiokia ebeta limi Izesu' evenele zuho ti' li li-ngimi ngimi' igi minani': Lingine Mose' lo huko-lidine' ma'mine igi O'moso'mi noso mili okodine lolovo huki hulamilizani' nene O'moso'mo do lungu' izamoloseive.

Acts 15

Zelusalemi Ebeku' Mulise Milani' Gamazi

1 Zudaia misuboukoti' ve linge ma ingine Adiokia ebeta limi Izesu' evenele zuho ti' li li-ngimi ngimi' igi minani': Lingine Mose' lo huko-lidine' ma'mine igi O'moso'mi noso mili okodine lolovo huki hulamilizani' nene O'moso'mo do lungu' izamoloseive. 2 A'mine lani' gamazi nene gili Pauloki Banabasiki a'mine vesi gamazi languti' lovo'ningu' ogavo lovo lolize naba hizani'. Ne'mine ogavo Pauloki Banabasiki ido' engikuti' ve linge masi Zelusalemi numuda duvikevo a'mine gamazimu' nene aposolokisi ido' gizebo ve lingesi ingine engi' ve'ninguti' gamazi lilizani' gililizave li gamazi di hamo' ani'. 3 Gamazi di hamo' igi Izesuda gi'mizi mulise milaa' ani' aleve ingine ngimiselikevo vani'. Nivi heta ato' ve lu'ine di velepe' izi O'mosola gi'mizani' gamazi nene vetete' igi Hoinikia misuboukisi ido' Samalia misuboukisi li-ngimikevo Izesu' zuho mukilite gili ngolize izi minani'. 4 Ido' ne'mine ikevo Paulolesi vi Zelusalemi numuda hetelani'. Hetelikevo Izesu' evenele mulisesi gizebo ve'inesi ido' aposolokisi mulise mili lamine' ikeve li-ngidikevo Pauloki Banabasiki ingine O'moso'mo hize ele' o-ngidivo gono dasine' gamazi nene vetete' igi li-ngimasine'. 5 Li-ngimikesivo Halisaio' zuhouti' evene' linge ma Izesuda gi'mizi minavelite oti ti' li lani': A'mine gono nidasivo heta ato' ve Izesu'nimu' gili ele'vole' ani' ingine O'moso'mi noso mili oko'ine lolovo huki hulilizani' o neive. Ido' Mose' lou' gamazi lo huko-lidine' nene gili dalizave lo lo-ngemelone' o neive li lani'.

6 Likevo aposolokisi gizebo vesi a'mine gamazimu' lo volelo' melo' ogo lolone li di gese' ani'. 7 Di gese' igi li volelo' melo' igi gamazi muki' likevo Petolo' oto ti' lo lo-ngimine': Vekizo, lingine neze zuho gililo. Evene' heta ato' ve Izesu' gamazi lamine' mene neni' ve'neti' gilii gili ele'vole' ilizave lo leli' vovoteti' O'moso'mo gozopo' gamene gala'mudati' vomine lingine zuho neni' nele'mize molani' nene mo gili nizave. 8 Ne'mine ogavo O'moso luteu' ningaa' ive'mo Zuda ve leli' eze Sikalahu' limine' ma'mino heta ato' ve nongemo ninge goloso o-ngedamaa' ine' monovo nene lelebizine'. 9 Ingine aka atoto' ngele'mize molamo a'mine a'mine do hamo' o-ledo heta ato' ve inginesi ezemu' gili ele'vole' ikevo engi' lu'ningu' goloso o minine' nesi gilite-ngidine' ma neive. 10 Oko'ine lolovo huki huli Mose' lo huko line' gamazi muki' gili dalizave ingine genivesi gono naba daa' nave. A'mine gonoli'mo avotemotine ngivize vivo lezesi livize vine' ve. Nemu' nene lingine O'moso'mo lamido' ivile' igi a'mine genivesi gono nene heta ato' ve Izesu' evenele zuho lili' ani' engi' ngimi O'moso golo izilisa nilahe. 11 Ne'mine amolone. Laza ti' lo gelaa' noune' ma neive. Ezemu' ha gele ele'vole' une' nemu' Guvelesi ve Izesu' aza nasahili' o-ledo do lu' izine' a'mine'mine ogo heta ato' vesi ezemu' gili ele'vole' ikevo nasahili' o ngemo do ngu' izeleseive.

12 Petolo' aza ti' lo lavo evene' muki' ingine lolize gani lami ve'ine bizi mini Pauloki Banabasiki ingine heta ato' vetida vi gono dasingu' nene O'moso'mo engikisi gono nodo amuzo ngemavo oso' amoso' nite' ato ato' di soto' asingumu' nene vetete' igi nilasivo gili minani'. 13 Li-ngimi osu' likesivo Zakobo' ti' lo lo-ngimine': Vekizo, neze zuho mate, gamazi ma loloze. Gililo. 14 O'moso'mo heta ato' ve engikumu' gelo lulo otavo eze zuho lili' ilizave lo aka vele-ngedo linge ma ngele'mize kegesine' gamazi nene Simeoni' vetete' ogo lo-lemavo gelekune' ma neive. 15 A'mine gamazisi ido' O'moso'mi gamazi li soto' iga' ave polohete nete gizi mili nizani' gamazi nesi nene vo milise' o neive. Ido' polohete malite O'moso'mo line' gamazi gizani' ma ti' lo neive:

16 Guvelesi ve
ado' gono daline' monovo nene gozopo' aka'milati' lo soto' ive'mo ti' lo nolive:
Naza nene tine' molo ogo
guvelesi ve Davidi' evenele zuho ingine
numuno gaza' hulupo elo lemo ongani' ne'mine igi limi ingi minani' nene
gohi do ote-ngedelesuve.
Ee, a'mine numuno gaza' zupo' o minine' nene
ngu'voso gohi gizo do gosoho' olosuve.
Ido' ne'mine olodoti' nene
evene' gohi lumo minani' nete
ado' neni' ve lo lo-ngiduvoni' heta ato' ve muki' nete
Guvelesi ve nenita igi gi'mizilizani' aka ma
vise' ilisave lo line'.
19 Ti' li gizi nizani' nenako naza ti' lo nogiluve. Heta vetidati' lu'ine di velepe' izi O'mosola nave ingine geni'vesi gono ngemamolone. 20 nGemamolone'za avazaha o'moso niteliti noso' nitekuti' nene namii vene' vemoho' gopo ingamii ize gulo nala' i-ngidanguti' namii ize guloliti vanise'ine namii malise igi kekeize li minilizave lo luhuvo nite' gizelone lo nogiluve. 21 Ne'mine okunivo Mose' lo huko line' gamazi linge ma minine' nene vo halekalive losa nolabe. Nene vo halekamoloseive. Gozopo' gala'mudati' avotemote ani' amani' igi leze Zuda veti mono' numude mini'mi monangu' holise' gameneu' gameneu' nene Mose' lo huko line' gamazi gati limaa' nanako ngelo vo halekamoloseive.

Mulise Milavete Gamazi Lani' Gamazi

22 Ne'mine lavo gili aposolosi gizebo vesi ido' Izesu' evenele mukikisi ti' li lani': Laza lelikuti' evene' sita' do kegese-ngedo ngimiselekunivo Paulole Banabasilesi maka' Adiokia ebeta vilizave. Ne'mine li Zuda' ado' gulive gohi ma Balasaba' ve lo minine' nesi ido' Silasi'nisi nene di kegesi-ngidani'. A'mine ve sita' ingine Izesu' zuholiti vovo'ningu' ve naba gidini minasine'. 23 Ne di kegesi-ngidi luhuvo ti' li gizi a'ningu' ngimi ngimiselani': Lengi' zuho aposolosi gizebo vesi laza lingine heta ato' ve leli' zuho Adiokia ebekukisi ido' Silia misuboukisi ido' Kilikia misuboukisi nizave lengikumu' isetine ve lo luhuvo nite' mene gizo nolingimune. 24 Laza lamunido' melati' ve linge ma lengita vi gamazi li-lingimi lengele'mize gopo ikevo gili gopo ani'. Ne'mine ikevo laza gelo 25 mulise molo ve seta' do kegeso lute ngeme nonive Banabasiki Pauloki engikisi ngimiselekunivo nesene maka' nivave. A'mine ve ingine Guvetesi ve Izesu' Kilisito'nimu' gilii ngibililizangumu' oko'ine hukamivo eze gono nene gopo di'mi vasine'. 27 Nemu' nene Zudangi Silasingi ngimiselekunivo ingine ve'ninguti' a'mine gamazi nene li-lingimikevo gililisave. 28 O'moso'mi Sikalahuli'mo aza ti' lo lavo lazasi a'mido' ve lo nolo hukune: Gono geni'vesi ma lengemamolosune. A'ne lo-lengemelone' gamazi nene lingine gili dalizado' o neivosa ha gili dalizaha Mose' lou' gamazi vaito' gili dalizave lo genivesi gono gohi ma gehe-lengedamolosune. 29 Lingine avazaha o'moso initeli'mi noso' nite' vata' ilizanguti' namilo. Ido' nala' i-ngidiliza ize guloti' namilo. Ido' ize guloliti vanise'ine namilo. Ido' vene' vemoho' gopo ingamilo. Ne'mine inite' mehedine imi malise gehepeve ilizani' nene vevesi minilisave. Lamine' ve. Moda ve.

30 Luhuvo nite' ti' li gizi ngimi di aka i-ngidikevo vani'. Vi Adiokia ebeku' heteli Izesu' evenele zuho muki' di mulise mili-ngidi luhuvo nite' ngimani'. 31 nGimikevo gati gili luhuvo gizani' gamazi ne'mo do ngi lo-ngedavo ngolize izi minani'. 32 Ne'mine ikevo Zudaki Silasiki ingine O'moso'mi gamazi li soto' iga' asive polohete minasine' nenako gamazi muki' li ngele'mize hongu li di ngi li-ngidasine'. 33 Ne'mine igi inginesi mineti' niigi ngimiselavela tine' mili vilisa nasivo Izesu' zuho ingine lingine muludingu' hongu lo minivo vilizo li mese' aseka li-ngidi di aka i-ngidani'. ^{▼▼ Gozopo' aka'mila gizani' Mono' Godolo linge mau' goholo 34 nesi ti' li gizikeni' neive: Ne'mine ani'za Silasi' aza mela ha minelove lo gelo vamive.} 35 Ido' Pauloki Banabasiki ingine Adiokia ebeku' mini inginesi ve lingesi Guvelesi ve'mi gamazi li soto' igi apizi ngimi ngimi' igi minani' ve.

Pauloki Banabasiki Vi Eza Ema Asine' Gamazi

36 Gamene ma ogo novivo Paulo' aza Banabasi'ni ti' lo lo-imine': Laza vo Guvelesi ve'mi gamazi lo soto' o ngemaa' usine' numudo' numudo' leze zuho soto' ani' ingine nadi' nadi' igi nizahe nemu' vo ninge-ngedelesive. 37 Ti' lo lavo Banabasi' aza Zohane' ado' gulive ma Maleko' ve lo minine' nesi ele'mizo volosive lo line'za 38 Maleko' gomu' ogo Pamahilia misubou' heteli gono a'mido' api' igi dalisa navo damolove lo-ngedo tine' molo ani' nenako Paulo' aza a'ne'mine ve ele'mizo volone' amive lo gele mino o've line'. 39 Paulo' aza Maleko' vamilive lavo nemu' nene Banabasikisi lovo lolize naba asine'. Ido' ne'mine asidoti' nene gohi makato' monamilisine' ogavo mine eze ema asine'. Ado' Banabasi' aza nene Maleko'ni ele'mizo vo sipiu' dizi vi golo gohilo' Kipilo ailaniu' vasine'. 40 Paulo' aza Silasi'ni do kegese-davo Izesu' zuho ingine Guvelesi ve'mo nasahili' o-ngedelive li O'mosola likevo vasine'. 41 Vi Silia misubouko ido' Kilikia misubouko heteli Izesu' evenele zuho mulise mili'mi monadaa moni monoku' di amuzo mili-ngidi'mi vasine' ve.